"أهلا بكم بشركة وانداندووو لخدمات الانترنت
اذا كنت تعرف الرقم المطلوب أدخله الآن أو انتظر لاجابة مأمور المقسم"
الزبون: ألو مرحبا, عفوا بدي أسأل عن رق…
مأمور المقسم: لحظة أحولك على القسم المسؤول. ] يتم تحويل المكالمة لقسم المبيعات [
- ألو مرحبا معك محمد من المبيعات كيف بقدر أساعدك؟
- أهلا محمد.. بدي أسأل عن..
- 300 دينار زائد الضريبة.
- شو هو 300 دينار؟
- سعر الاشتراك بخدمة الانترنت سنويا.
- عفوا أنا ما بدي..
- طيب بعطيك معاه هدية مجانية وخصم ...
- عفوا شكلك فاهم الموضوع غلط; أنا مشترك معكم وبدي...
- أها فهمت عليك انت مشترك وبدك تجدد; لحظة خليك معي.. ] وبسرعة يتم تحويل المكالمة [
- مرحبا معك سهير من قسم العناية بالزبائن
- عفوا أنا ماهر الخطيب وبدي...
- والله سيدي راجع السيلزمان (رجل المبيعات) تبعك وهو بحللك المشكلة تبعتك
- لأ انا ما عندي مشكلة بس بدي اسال...
- طيب لحظة شوي ]وبسرعة فائقة يتم تحويل المكالمة للدعم الفني[
- ألو معك حسان من الدعم الفني
- لو سمحت أنا مشترك معكم و....
- جرب اطفي المودم وارجع شغله
- يا عمي شو خص المودم انا.....
- أنا اسف بس المشكلة مش من عندنا راجع الاتصالات المشكلة مش من عندنا.. شكرالاتصالك ونهارك سعيد
- يا زلمة اسمعني, أنا..... ] وكما سبق يتم التحويل لقسم آخر وبسرعة [
- ألو معك لينا من قسم التحصيل
- أهلا لينا.. اسمعيني أنا متضايق كتير منكم, أنا....
- عفوا لازم تدفع اللي عليك والا بنفصل الخدمة عنك
- يا بنت الناس أنا...
- طيب لحظة أحولك على المحاسبة بلكن حلولك المشكة.. ] وكالعادة يتم تحويل المكالمة [
- ترن ترن ترن ترن ترن ترن (المحاسبة)
- تووووت توووووت تووووت ]لا أحد يجيب من قسم المحاسبة وبالتالي يتم تحويل الخط لرقم آخر[
- آلو أيوه يابيه أنا حسنين حارس العمارة, مين معي؟ عايز حاجة؟
بالنهاية صاحبنا زهق وسكر الخط وانتهت معاه قصتنا..
بس ضل نعرف انه هو كان حاكي مع الشركة ومر على كل الأقسام وتعرف عليهم
جميعا بس عشان يسألهم عن
.
.
.
.
.
رقم الفاكس!!
ليست هناك تعليقات:
إرسال تعليق