الزمان: الأربعاء, الثالث من شهر سبتمبر عام 2003 الساعة الثانية ظهرا
المكان: باص جامعة العلوم التطبيقية – خط الجامعة الأردنية
الباص فاضي ومطول حتى يتعبى… يااااااه … بالفعل كان اليوم شاق ومتعب .. كان علي اليوم امتحانين فاينل, ومش اي امتحانين .. اخر امتحانين بحياتي الجامعية …. وقبل دقايق تأكدت من المادة الخايف منها اني نجحت…
يعني خلاص .. خلصت جامعة, خلصت مرحلة مهمة في حياتي … معقول؟؟؟ كنت مفكر انو أول ما راح أخلص راح انبسط وأطير من الفرحة, ما بنكر اني فرحان وشعور الفخر يراودني , بس ليش هالخوف؟ ليش نبرة الحزن اللي صايبيتني؟؟؟
قبل أربع سنين الا شهر تقريبا كنت واقف برده هون بنفس المكان, ويمكن بنفس الوقت تقريبا, كنت واقف لحالي غريب , بسأل وين الباص اللي بودي على الجبيهة , كنت لحالي وما بعرف حدا معي .. كنت ايامها مخلص توجيهي ومفكر حالي خلصت مرحلة وخطوة من مراحل حياتي..
وهلا بعد اربع سنين برده لحالي ,برده بفتش على الباص اللي بودي على الجبيهة , بس الاختلاف انه اللي حولي عارفهم وبدل ما أكون خلصت توجيهي صار معي شهادة البكالوريوس….سبحان الله مغير الأحوال.
بعد اربع سنين جامعة, هلا بغادرها وللمرة الأخيرة بشكل رسمي وانا طالب, آخر مرة باجي على الجامعة وانا اعد طالبا فيها, آخر مرة أقدم فيها امتحان, اخر مرة استيقظ من الصبح مع الشمس وادرس واراجع لامتحاني, اخر مرة بدخل على قاعة امتحان , اخر مرة وشعور رهبة الامتحان يراودني …
ولكن هل بالفعل انتهى الصعب ولم يبقى شيء؟؟؟؟؟ هل مع الحصول على الشهادة الجامعية سيكون طريقي مفروشا بالورد؟؟
تذكرت سنة أولى وكيف كنت غريب .. ما بعرف ولا حدا … تذكرت أول طالب سنة اولى زيي تعرفت عليه – الله يسهل عليه كان طالب بالفنون الجميلة … تذكرت اول محاضرة بحضرها – كانت كيمياء عند احسان شبيب – تذكرت أول مادة تخصص – مقدمة حاسوب عند زياد شعبان … تزكرت أول شاب بالتخصص دفعتي تعرفت عليه – مراد صبري - … تزكرت أول كويز – كيماء جبت صفر من خمسة - تزكرت أول فيرست – مقدمة في الحاسوب وجبت 16/20 - تزكرت اول مرة بسحب علاماتي … تزكرت الفصل التاني ولأول مرة بسجل لحالي … تزكرت مقبولة (موظفة التسجيل) تزكرت أول مادة معاناه – سي ون مصباح عقل … تزكرت المختبرات والاساتذة معن الحوري, عبدالله العبدلي ودياب … تزكرت معاناة الدراسة وكيف بنكون مخلص الفصل ومش فاهمين شي من المادة وكيف كنا ندرس الشباب احنا مع بعض … تزكرت مشروع التخرج والعجقة والبلاوي.. .ياااااه شريط الزكريات اربع سنين .. حلوها ومرها مروا كأنهم اربع ايام …..
أربع سنين .. بالفعل سريعة لكن الكثير والكثير تعلمت منها.. ليس على المستوى الأكاديمي فقط .. انما أقصد أنها كانت مدخل لمدرسة الحياة التي بالتأكيد ستكون ملازمة لنا في حياتنا العملية… والدليل من يعرفني انا مثلا سنة أولى وكيف تغيرت مع مرور الزمن حتى وصلت للتخرج .
هلا خلصت جامعه… هل يعني انتهت مرحلة الطيش و الفياعة؟ هل يعني انه كبرنا ومسؤولية كبيرة هلأ؟؟؟ هل يعني استقرار وأكثر رصانة؟ هل يعني مصاعب واحتكاك بالحياة هلأ؟؟ سؤال اجابته بداخل كل شخص عندكم.
صراعات وأفكار بين الماضي والحاضر والمستقبل… لكن شكلوا الباص وصل للبيت ولازم أنزل … يعني راح تكون آخر مرة أنزل منها من باص الجامعه ….اذن هو الوداع .. الوداع ياجامعتي .. أو بالأحرى الوداع لحياتي الجامعية وأهلا بالمستقبل .. وبالتأكيد شكرا لك يالله اللي أنعمت علي بنعمة الدراسة الجامعية - اللي كتير حرموا منها وما توفرت لهم – وخلصت على خير.
ايييييييييييييييه أخي عالجامعة و ايام الجامعة ما احلاها
ردحذفاخ يا عاشق القمر والله ذكرتني بأول يوم بالجامعه و كيف كان الدوام و النكد تاع سي وان الحجز للمحاضره و كيف كنا نروحلها قبل بنص ساعه و كيف نتخانق عالأماكن…
ردحذفذكريات الزمن المر الحلو…
هلأ الجامعه ما بتندخل صارت كئيبة ومو حلوه حتى الكليه مبنى واحد اتغير ركبولو جدران جداد بدال المكسره و دهنو الحيطان فكل يلي كنا كاتبينو للذكرى راح…
لهلأ مر علينا 3 سنين واحنى متخرجين و الحياه اخدتنا معها وكل واحد انشغل بحياتو وبس بضللنا ذكريات بوقتيها كانت مره بس هلأ صارت حلوه و بنتمنى ترجع هديك الايام لانى كنا رايقين مو متل هلأ حياتنا صعبة…
Shuf el denya ya Mohammed Shu zghyreh we was at same iniv o la2yna 7alna bi same work …be beni o benak zkryat el jam3ah ma btet3wad m3 enu fya mshakel o drseh o shaer o mderi shu bs kter 7lweh o 3njad hadi mr7leh kter 7lweh bi 7yat kel w7ed o bt3lam menha kter ehsya
ردحذفbs hayna now edrna nakhud thmryet hal 4 snyen o 3njad ayam 7lweh bi kel shi swa2 bi a3det lma nakul turkey lma bel sheta nwa2ef bus lma nji 3la exam o nstna ntjtu o khyfen nenja7 or nop
alh yshel 3al jmye3 bi hal jm3ah o esp bi our college (IT) o enshla bokra btshufha hal mr7leh el 7lweh bi wldak
Suhaila